ភ្នំពេញ៖ រដ្ឋមន្ដ្រីក្រសួងអប់រំ យុវជន និងកីឡា លោក ហង់ជួន ណារ៉ុន បានមានប្រសាសន៍ថា ក្នុងបរិបទកូវីដ-១៩ ការពន្លឿនកំណែទម្រង់សាលារៀន និងកសាងសមត្ថភាពស្ថាប័នជារឿងអាទិភាពដើម្បីធ្វើការផ្លាស់ប្តូរការអប់រំឱ្យទាន់សភាពការ។

ថ្លែងនៅតាមរយៈប្រព័ន្ធអនឡាញ ទិវាអប់រំអន្តរជាតិ ឆ្នាំ២០២២ ក្រោមប្រធានបទ “Changing Course, Transforming Education” កាលពីថ្ងៃទី២៤ ខែមករា ឆ្នាំ២០២២ម្សិលមិញ រដ្ឋមន្ដ្រីក្រសួងអប់រំ បានចែករំលែកផែនការយុទ្ធសាស្ត្រមួយចំនួនដែលកម្ពុជាបានដាក់ចេញ ដើម្បីពង្រឹងប្រព័ន្ធអប់រំជាតិ ដោយកម្ពុជាបានខិតខំប្រឹងប្រែងកាត់បន្ថយ ផលប៉ះពាល់នៃជំងឺកូវីដ-១៩ មកលើប្រព័ន្ធអប់រំ ដោយបានផ្លាស់ប្តូរវិធីសាស្ត្រនៃការសិក្សាទៅជាការសិក្សាបែបចម្រុះ។

លោក ហង់ជួន ណារ៉ុន ក៏បានបញ្ជាក់ផងដែរថា ដើម្បីឆ្លើយតបនឹងកូវីដ-១៩ ចាំបាច់ត្រូវធ្វើកំណែទម្រង់ប្រព័ន្ធអប់រំដោយប្រើប្រាស់បច្ចេកវិទ្យា ការសិក្សាពីចម្ងាយ ផ្លាស់ប្តូរវប្បធម៌នៅសាលាដោយប្រើវិធីសាស្រ្តក្នុងការបង្រៀនថ្មី អភិវឌ្ឍន៍ជំនាញក្នុងសតវត្សទី២១ ចូលរួមក្នុងការធ្វើកំណែទម្រង់សាលារៀន សម្ភារៈសិក្សា និងលើកកម្ពស់ដៃគូឯកជន។

រដ្ឋមន្ដ្រីក្រសួងអប់រំបានលើកឡើងបន្ថែមថា លទ្ធផលនៃការប្រលងសញ្ញាបត្រមធ្យមសិក្សាទុតិយភូមិ បានបង្ហាញពីការខិតខំប្រឹងប្រែងរបស់កម្ពុជាក្នុងការពង្រឹងនិងអភិវឌ្ឍវិស័យអប់រំ។

ទិវាអប់រំអន្តរជាតិឆ្នាំ២០២២ នេះត្រូវបានរៀបចំឡើងដោយ ការិយាល័យសហប្រតិបត្តិការអន្តរជាតិ (ICO) របស់នាយកដ្ឋានអប់រំ នៃប្រទេសហ្វីលីពីន និងមានការចូលរួមពីរដ្ឋមន្ត្រីអប់រំមកពីប្រទេសមួយចំនួន រួមទាំងភាគីពាក់ព័ន្ធក្នុងវិស័យអប់រំជាច្រើនទៀត ដែលមានប្រទេសហ្វីលីពីនជាម្ចាស់កម្មវិធីក្នុងឆ្នាំនេះ៕